રણઝણતી ઘૂઘરી

હું નાની હતી ત્યારે ઈંગ્લીશ માં બોલવા, લખવા અને વાંચવા માટે ખૂબ પ્રયત્નો કરતી. આજે મને મારી માતૃભાષા ની મીઠાશ માણવી છે, ફરી એ  સ્કૂલ જતી છોકરી બનવું છે થોડી વાર માટે. અત્યારે અહિયાં વરસાદ પડી રહ્યો છે. આ ટીંપા નો અવાજ, આ પાણી ની ધાર, આ વાદળો નો રંગ, આ ઠંડો પવન, એમને મન મુકીને માણવા છે. જેમ હું નાની હતી ત્યારે મારા પપ્પા ના ઘર માં માણતી હતી. પહેલા તો જેણે આ ગુજરાતી ટાયપીંગ ની વ્યવસ્થા કરી એ ગૂગલ ના એન્જીનીઅર ને ધન્યવાદ।

મારે ફરી એ ગુજરાતી પુસ્તકો ના મેળા માં જવું છે. અમુક ગુજરાતી શબ્દો જેનુ  અંગ્રેજી ભાષાંતર એને પૂરો ન્યાય આપતું નથી એના શબ્દો ફરી લખવા છે અને બોલવા છે. એ  નાનપણ નુ ભોળપણ હવે પાછું આવવાનું નથી. પણ છતાં મન ને આ વરસાદ માં તરબોળ કરવું છે. હું મારી આસપાસ ની દુનિયા માં રહીને ક્યારેક એ ભૂલી જાઉં છું કે કાચ શું અને રત્ન શું. 

આ પ્રકૃતિ નું અસીમ સૌન્દર્ય જે માણસ ને વિના મુલ્યે મળે છે એની કોઈ કિંમત નથી એના મન માં. કારણ કે એ તો બધા ને સરખા ભાગે મળે છે અને મફત માં મળે છે. માણસ ને એવી વસ્તુ નો આનંદ મળે છે જે માત્ર એની પાસે હોય અને બીજા પાસે ના હોય. એને આનંદ વસ્તુ નો નથી પણ એ વસ્તુ માત્ર મારી પાસે છે અને તારી પાસે નથી એનો છે. પ્રશાંત મહાસાગર નો પટ મેં જોયો છે અને તે નથી જોયો એટલે પ્રશાંત મહાસાગર સુંદર લાગે છે. 

iPhone કે Samsung કે કોઈ પણ બ્રાન્ડેડ વસ્તુ દુનિયા માં high profile ગણાય છે એટલે એ ખરીદવાનો અને વાપરવાનો આનંદ છે. એટલે નહિ કે એ ઉપયોગી છે કે વાપરવા માં સહેલી છે કે વજન માં હલકી છે. જો બધા પાસે iWatch હોય તો એ પહેરવાનો આનંદ ઓછો થઇ જાય છે. એટલે તો આ કંપનીઓ દર વરસે એક જ વસ્તુ ના જુદા જુદા version કાઢી ને લોકો ને ઉલ્લુ બનાવી શકે છે.  

ભગવાને માણસ  ને અતુલ્ય બુદ્ધિ આપી પણ સાથે સાથે ઈર્ષા અને મત્સર જેવા બે-ચાર ગુણો પણ આપી દીધા જેનાથી એની બુદ્ધિ હંમેશા ઢંકાયેલી રહે. એ બહુ જ ચતુર છે. દુનિયા ની સૌથી અદભૂત ચીજો ને એણે  એટલી સહજતા થી માણસ ની આંખો સામે મૂકી છે કે માણસ ને એ almost અશક્ય લાગે છે કે અદ્ભૂતતા આટલી સરળ હોઈ શકે અને આ જ માયાજાળ માં એ છેતરાઈ જાય છે. 

વરસાદ રોકાઈ ગયો છે અને ચકલીઓ નો અવાજ એવો જ આવી રહ્યો છે જેવો ઇન્ડિયા માં મારા ઘરે આવતો હતો. અને મને એ વાત નો આનંદ છે કે હું હજુ આ કિલકાર ને માણવા માટે સક્ષમ છું.